En 1861 m. sillinas 11 d. gimma Marīja Sēki (miksiskai Marie Seeck) en Kunnegsgarbu, kunsteniki, grāfikeniki. Tenā buwinnusi en Kunnegsgarbu pastippan gīwatan, adder pintegaūwusi pa Kursjan Kāpans, Semban be prei Gudānitan. Aulaūwusi tenā dīgi en Kunnegsgarbu en 1935 m.

En 1902 m. Marīja pagaūwa makīntun si en Kunnegsgarbas kunstas akadēmijai, en “klassei per gennans” prei Ljūdwigan Dettmanan, Ēnrikan Wolffan be Ōlofan Jernbergan.

Marīja Sēki glaubāwusi tautāspawidans be architektūrin. Tenā deznimai kāimalukiwusi Niddas kunstas kolōnijan. Tenesses bidjāi perlānkja prei miksiskan impresiōnisman, adder ni seitāi sen tenesse prancōziskan izpresnan kāigi, prei perwaidīnsnan, Lōwjas Kōrintas bildjāi. Marīja Sēki etwaidinna drūktawingiskas, niidealizītas Prūsas tautāspawidas sklāitiskans. Tenā tikinna swāise prūsiskan stīlan, sklaitināntin si ezze prancōziskas impresiōnismas estētikei. En 1927 m. Marīja Sēki immusi delīkan en Prūsas kunstas izsadīnsnai en Berlīnu sen swāise trins glaubālins iz Kursjan Kāpan temātikin.

Stan subban Sembas krāntas deīktan – pawīda ezze Debīkamans Kursjamans en Wakbūdas gārban – teinū:

Palīgu deīktan ezze Kursjamans līnku Rantawas teinū:

////

1858 m. līpas 21 d. gimma Lōwis Kōrints (miksiskai Lovis Corinth), waīsts prūsisks kunsteniks, en Tapjawai. Impresiōnists, dīgi ekspresiōnists. Tenesse prūsisks emmens mazīlai būtwei iz werban kurtun: Kurīnts, “stas kas kurrja”, anga Kārints, kāigi tāns subs iztarēi swāise emnin, sen ilgan ā, bilīntjai dialektiskai.

En 1876 m. tāns praskīja iz Tapjawan en Kunnegsgarban makīntin si en Kunnegsgarbas Kunstas akademījai ērgi 1880 m. Panzdau aujāja en Mikskātautan.

Be en 1888 m. etwartinna si en Kunnegsgarban. Tāns bēi aīns iz pirmans kunstenikans iz Niddas Kunstas Kolōnijan.

Mazīngi palīgintun L. Korintas Niddas kapurnan sen D. Staššus Niddas kapurnan.

////

1893 m. zallawas 13 d. gimma Kārls Knāufs (miksiskai – Carl Knauf) en Bad Godesbergu (Zēimiskas Rēinas Westfālija), Niddas kunstas kolōnijas kunsteniks – wēlas impressionismas pertreppeniks. En 1920-40 mettans K. Knaufs bēi aīns iz ukapōpularaisins Niddas kunstenikans.

En 1917 m. tāns wedduns gennan Prīdelin Rifenštāilin iz Gudānitan. En 1918 m. pirman rēizan tāns perjāja en Niddas kunstas kolōnijan. En 1921 m. K. Knāufs perjāja en Kunnegsgarban be buwinna en Trākaimu. Be en 1921 m. tāns ōrganiziwuns swāise pirman izsadīnsnan en Kunnegsgarbas kunstas ūnijai. En 1928 m. be en 1932 m. K. Knāufs bēi pagattawinuns swāise persōniskans izsadīnsnans en Mēmelei. En 1931 m. K. Knāufs zēiduns buttan en Niddai, na kāpan prei Purwīnan, nitāli ezze Tōmas Mannas buttu, be praskīja en Niddan. Tētet K. Knāufs bēi pirms iz kunstenikans kas zēiduns buttan en Niddai be pagaūwuns stwen buwīntwei. En tenesse buttu bēi naseīliska atmōsfera. Tāns subs spārts rettai gūbi en perōniskans Kunstas kolonijas ebtiksenjans – karwaūkai tenesmu ni padīngus. Tēt dīgi en Niddai tāns be aulaūwuns en 1944 m.