Dāinas na Gediminas gārban

En Zallawas 31 d. — en panzdauman wassaras dēinan — en Wilnei, Leītawai na Wilnis Gediminas gārban audāi si enswentinsnas dāinas stesses Īnijas Trinkūnienis — Leītawiskas Rāmawas Kriwwis. Subbas dāinas audāi si en 12 st.

En 2002 spallinas 19 d. en Wilnei na Gediminas kapas gārban bēi enswentintan Jōns Trinkūns (1939 m – 2014 m.), pa tenesse gallan Īnija Trinkūnieni bēi izrīnktan kāigi Kriwwi — sta bēi pērnai en lapkrūtjas 23 d. Adder tēr sāndēinan tenā bēi enswentintā.

Subbas dāinas pagaūwa si dabber ānkstais prēi Ragūtjas stabban — pīrman rēizan deīws Ragūtis bēi minītan en 19 mm. pra Teodōran Nārbutan — pa Nārbutan Ragūtis ast pīwas be meddus deīws. Stesse pagan en pagaūsenju dāinas be grēmas bēi palīkitan stesmu deīwu be Gabijai — pannus dēiwei.

Dāinas prei Ragūtjas stabban

Īnija Trinkūnieni — nawwa Kriwwi

Pa dēinans prei stabban pagaūwa si eisnā prei Wilnis katedrālin — pa kelli appuns na stan deīktan bēi Perkūnas ālkan. Panzdau jāu eisnā pergūbi na subban Wilnis Gediminas gārban, kwēi jāu bēi enswentinsnas dāinas — sirzdau wāisjans bēi dīgi zmānes iz Īndijan. Pa dāinan na gārban eisnā pergūbi etkūmps prei katedrālin — prēi Gediminas pamīntlan, kāi pateīsinlai kunegikan Gediminan.