Tīgelisks tals sen pelannan be kannawin

K. Skworcōwas wedāntjai, en 2013 m. daggan be assanin, ēit archeolōgiskai kapsenjai en Kunnegsgarbas lastādijai. Stwi aupaltan 14 mettasimtas buttan. Buttas zeidāi ast iz sakstans. En buttas sirdu ast deīktan, grīnstan sen tīgelins. Gadāi di, kāi stwi bēi stabnī anga pelanna. Šandēinan sta perwaidinna si ikāigi deīktan per apperans. Dabber ast kittan deīktan per dēlasnan sen pannu – stwen mazīlai būtwei kammins. Buttas ljūdis turēi līkutan dēlawan en swāise buttu, kwei tāns dēlawuns sen gelzan. Aupaltas dīgi gelzas leīsnas fōrmis.

Dabber erlaikāi si tallus delīks. Tals pastāi tikīnts iz līkuntans lubbans, ēst iz wippjans. En buttu dabber tēnti mazīngi widātun aīnan līkutan stubban. Gadāi di, kāi sta bēi māigastuba. Aupaltas dwāi kannawis, enkaptas en zemmei (en buttas tallu), en kawīdamans ljūdis mazēi laikātun undan. Dabber stwen ebtikts tīgelis delīks, na kawīdan bēi glaubāli.

Glaubāli na tīgelin

Buttan stalīwus na subban Prēigaras krāntan. Be entikriskai prei buttan aupallusis kaulāi stēisan zwērin be zukkan, pa kawīdans paleozoolōgai panzdau mazīlai aulemtun kawīdai zukkai buwinnusis en Prēigarai en 14 mts.
En stans kērdans šin buttan stalīwus ni en subsmu mēstu – Lastādija staddan bēi prēimestan, en kawīdsmu bēi rēdi be sparrjus. Be māisterjai, kawīdai dēlawusis sen pannu, ni mazēi sta segītun en mēstu ugnjas tiksnas paggan. Stesse paggan tenēi turēi turītun swāise buttans sen dēlawans en prēimestu.