En 1851 m. sakkjas 14 d. gimma Ādalberts Beccenbergeris (miksiskai Adalbert Bezzenberger).
1859-1869 m. studīwuns si en Prīdrikas licēju en Kunnegsgarbu.
En Gettingenas uniwersitātei tāns mettuns germānistkin, pagaūwuns enlaukītun indōeuropistikin be baltistikin.
1880 – 1921 m. dēlai en Kunnegsgarbas uniwersitātei (trins rēizans na rīndan bēi uniwersitātis rektōrs).
En 1876 m. perlazinna enlaukīsnan ezze wārans prūsiskans emnins.
En 1879 – 1880 m. senrīnka folklōrin en Prūsas Leītawan, enpeisāwuns 67 grēman tekstans be 34 melōdijans.
En 1897 m. tāns perlazinna 14 mts. prūsiskan wirdeīnan (“ēlbingiskan”).
En 1883 m. tāns perlazinna enlaukīsnan stēisan arāikan sirzdau prūsans be leītawjans en Prūsas Leītawai.
Ezze 1891 – 1916 m. tāns bēi Prūsiskas wāriskas perōnis wediks.
En 1907 m. perlazīnuns enlaukīsnan ezze tirtas prūsiskas katekizmas billan.
En 1912 m. pagruntina Prūsas etnōgrafiskan “Taweīnas” muzēijan prei Kunnegsgarbas Zoō.
Ā. Beccenbergeris ast laikāts kāigi baltistikis pagaūweniks – tāns enlaukīwuns baltiskans billans, folklōrin, literatūrin be archeolōgijas pamīntlans.
