Etkūmps en anzanans

Swāikstisna pagaūwa si. Na stattun sembiskan krāntan, en zeimammans, mes paprettamai auwērptun pintegas skreīljans be etwertun akkins.

Kirsnāi kirsnāi kirsnāi stabāi
En zēimiskamans bāngamans
Wīrta en zēgerins
Per gremjāntins mātins
En kalpenimans stēisan mettasimtan –

Swāikstisna pagaūwa si. Be auskēndusjas lāiwas turmai en jūrju wīrta en Wētras dwarrins!
Kliptinai be eīskei… kāigi nikaddan en gīwatai
En zēimiskamans bāngamans
Kīrsnas kīrsnas kīrsnas
Āustabawingis stabbas trōns –
Per wētran as dāncau, tēr per wētran as dāncau
En prūsiskas dāngus tīnklamans

Be tikka gremjantī māti –
Swāikstisna pagaūwa si! – panniskai buccau etwartīnusin si sūnun be tūsimtai mettai wīrta en akkismirkinsnan – kāigi šandēinan, tēt bētan…

Tenā stalāi nagā,
Kruwwina,
Etkūmps maldā –
Sen kruwwinans wārsans
Zwēriskai grazī
Sen kruwwinans rānkans
Stesses grabbewingis spārtis
Sen kruwwinans kreklans
Stesses timras māteristas –
Ilgisnā wīrta en burrjans,
Tīmenis – etkūmps en anzanans! Etkūmps en anzanans!

Swāikstisna pagaūwa si! Be wētra ni mazēi stātwei – tenā drezzi wissan sen naktin, beggi lāuksnas maigīnusjas saūlin.

Tenā stalāi nagā
Kuntentī māise sīran
En stessei naktei
pilnai gezēiras
pilnai bijjas be stēisan skripintin dwarrin
Mes wīrtamai etkūmps ēmperi
Na lunkins stēisan sembiskan stalkerin

Stēnseniskai buccauntei etwartīnsnas šaūsmans, gēidimai na nika kittan, tēr na Āustras zentlan. Be tūsimtai mettai wīrta en pelannin. As dwassiliwuns sen tuldīsnan… aupalluns Ten… ēnwangan.
Zwēriskai grazzjan.

Be Saūli etskīja,
Mes etwartinna si en zarawīngin Zemmin,
Sen degāntins
Wārsans

*Papeisātan 2001 m. sillinas 22 d. ezze stan ka pastāi widātan en Sembai na Rantawas raggan en sillinas 21-22 naktin.

 Ugņus Lōgi

Sklaitīnsna: Teikā