I
Kattins be Pūki izgūbi en jūrjan
En grazzjai zallei āldjai,
Immusis meddu be penningans tūlan,
Wijātans en pēnkjans pundans.
Pūki dirīwusi ūnzai en lāuksnans
Be grēmusi sen gitarrin,
“Ō Kattine stebbuls, tū majā mīli!
Kawīds grazzus Kattins tū assei!
Tū assei, tū assei,
Tū assei, tū assei
Kawīds grazzus Kattins tū assei!”
II
Kattins bilāi: “Elegantisks pippel,
Kāigi grazzjai be saldai tū gremja!
Per ilgai mērimai, pattinimai!
Kwei adder prēipirstan īmtun?”
Plūwa tenēi tēt mettan be dēinan
Prei tāutan kwei Skāberwis aūga
Be stwen en medju nōmaits stalāi
Sen prēipirstan en nāsei
En nāsei, en nāsei
En nāsei, en nāsei
Sen prēipirstan en nāsei!
III
“Tēmprasis nōmait, perdāsei per šillingan
Prēipirstan?”, “jā”, – tāns bilāi.
Immi tenēi stan, be jāu kittan dēinan
Pattina gārbas Kalkūns dins.
Ēda tenēi stwen lūgjans be wēisjans
Sen krēiwan gigāntiskan sakkin.
Rankā en rankai, nō krantas zigzdan
Dāncau en mēnikas swāikstu
Mēnikas, mēnikas
Mēnikas, mēnikas
Dāncau en mēnikas swāikstu!
The Owl and the Pussy-Cat. EDWARD LEAR. Talkawuns Wārs Kāpeniks