Wazukkas upperausna prei nidruwīngins jātawins sen sklaitawīdans dāinans, kawīdans tenēi izpilninusis zūrgi 1520-1530 m.

Ezze zūdewitans (Zudewiten), kwāi teinū bilāi si be bilāi di per sūdawins (Sudauen) be kāigi tenēi izpilnina swāise dāinans

Tenēi izrīnka sebbei wāran wīran, kawīdan laikka di per teisīngin be swentikan, kāigi mes bīskapan, tāns pastānja bilītan per wārskaitan (Wourschkaity), pra tennans, zmōnitints swāise dēiwans, erzinna ezze swāise enwārgsenjans be perdāst di swāise pakwaitīsnans deiwammans.

Emnes stēisan dēiwan ast:

Dēiwibis stēisan zūdewitan (Deywoty Zudwity):

Ukapirmas (Ockopirmus) — pirmas, dāngus be lāuksnan dēiws.
Swāikstiks (Swayxtix) — swāikstas dēiws.
Aušauts (Auschauts) — enwārgsenjan, niwarin be kailūstiskas dēiws.
Autrīmpus (Autrimpus) — jūrjan be marrjan dēiws.
Patrīmpus (Otrimpus) — tēnkantis wūndan dēiws.
Bardāits (Bardoyats) — laīwan dēiws.
Pergrubris  (Pergrubrius) — augīna lappans be zāljans.
Pilnitis (Pilnitis) — stas dēiws eblāimei be pilnina jaūjan.
Perkūns (Parkuns) — grumminas (perkūnas), mēldan be sūjis dēiws.
Pikuls (Peckols) — pikullas be timras dēiws.
Pōkuls (Pockols) — skraidāntjai naseīljai anga pikullai.
Paskaits — zemmis dēiws pa swentasmu bezzan.
Bārzdukai (Barstucke)  — līkutai zmānes.
Markapālis (Markopole) — zemmis zmānes.

Stwi ast swarewīngjai deiwāi, kawīdans tenēi uperrawintei wazukkan, zmōnina, pawērtina be laikka per ukadebbans. En kītsmu upperausnans tenēi preiwakēi ni wissadan dēiwans, adder tēr ukaswarewīngjans en stawīdan rīndan. Tenesse pirmans swentikans swentinna di pirzdau stan, kāigi ēitwei sen plūgan en laūkans. Stans swentikans tenēi bilāi per Pergrubrjas (Pargrubrij) upperausnan. En wisēimans kāimans tenēi ēit en ainan buttan. Stwen pagattawinta debīka kannawi anga pīwas dwāi kannawis. Wārskaits (Wourschkaite) erlāngja plasan kārtin, pilnan pīwas, sen rānkan be madli „Ō, galwe be dēbe dēiwe Pergrubri (Pargrubrius), tū izgunna zēiman prēipaus be wartīna etwārtai pastipasmu tāutan lappans be zāljans, mes madlimai ten, kāi tū be paaugīnlai nūse arrjan be pernaikīnlai wissans nizāljans“. Bilīntei tēt, tāns zemmai laīdja kārtin, gabja, erlāngja sen dāntins, izpūja be metta tennan pra gālwan, nikāusināntei sen rānkans. Ains na tennan gēidja, erlāngina kārtin, pēda etwārtai be pilnan sen pīwan statīna pirzdau Wārskaitan (Wourschkaiten). Staddan tāns pagaūnja etkūmps be madli, kāigi bēi ebpeisātan ānkstais, dēiwan Pergrubrjan, kāi tāns segīlai etnīstin, kāi patengīnlai ānkstan sūjin be ergalīnlai Pikullan (Peckollum) ēmperi sen tenesse pamestan Pōkulan (Peckolli), be izpūja kārtin kāigi ānkstais. Panzdau wisāi pūja en skrittu.
Tīrtan rēizan tāns pagaūnja be madli dēban dēiwan Swāikstikan, kāi tāns sen swāise swāikstan en prawerīngjan be tikrōmiskan kēsman erswāikstinlai arjan, zāljan be pekku. Pa stan tāns dabber rēizan pagaūnja be madli debban dēiwan Pilnitjan, kāi tāns dālai augtwei debīkasmu grazjāmans wāltjans be kāi tūlninlai tenēimans arjans en jaūjai, tēt kāigi ānkstais [bēi ebpeisātan]. Tēt tāns pūja, erainasse dēiwan teīsei be girsnai, pīwan pilnan kārtin, nikāusināntei sen rānkans. Kitāi [dīgi] — nikāusināntei sen rānkans; be kārts ni turri būtwei pastatīntan, adder turri di tennan laikātun. Panzdau tenēi gremja grīmans dēiwan teīsei. Pīws pastānja kāuptan jāuku ezze perōniskasmu zemmis gastan: āusts, kawīds izaūga nō stan zemmis gastan, pastānja perdātan be platti di per pīwan.
Kitāi tenēisan upperas swentikai — pa āustas pjaūwan. Ik āusts ast izpalewīngi, tenēi upperaui, zmōninantei ānkstais paminītans dēiwans, spārts tennans dīnkawintei. Wārskaits (Wourschkaiti) pērwakau maldūnjans, kāi tenēi dēiwans zmōninlai be tennans ni ernertīlai. Tenēi widāi, kawīds bēi dags be kawīda bēi pjaūwa, be wiss wangīna si kāigi ānkstais bēi ebpēisatan — kaddan izpūja di pilnan pīwas kārtin. Adder ik mettan bēi sūjiskan be arrjas ni brendusjas anga pastāi wārgai pjaūtan, tenēi dīgi gatawinna swentikans. Be Wārskaits (Wourschkaiti) madli debban labban dēiwan Aušautan, kāi tāns madlilai dēiwans Pergrubrjan (Grubrium), Perkūnan (Parkunen), Swāikstikan (Swayxtixen) be Pilnitjan (Pilniten) būtwei labadīngewin tenēimans kittan mettan. Tenēi pazinna kāi ernertīwusis swāise dēiwans. Staddan tenēi palīki ains kītsmu kassjan. Eraīns turri preidātun prei pīwan sētas māizjas pussin, en rēizans be wissan sētan. Dīgi imma di kassjan ezze stēimans, kwāi perlīmi tenēisan ensadīnsnans be kwāitans. Gennas turri preipestun geītin iz pīrman āustan. Tēt tenēi īst pra upperausnan, kawīda tenēi tēt — kelli pīws ast.

Kāigi tenēi upperaui wazukkan

Adder kaddan tenēi kwaitēi upperautun wazukkan, staddan ketturjai anga pēnkerjai kāimai rīnka si. Ik tenēisan ast tūlan, kāupja di kurwans be rīnka si wisāi en ainasmu buttan. Stwi labbai endegga pelannan, gennas perpēda gāidjas miltan be engnāta zīngslan. Wazukkan anga kurwans tenēi etwedda prei Wārskaitan (Wourschkaiti), šis nalazīna dwāi rānkans nō tennan be bilāi, madlintei wissans dēiwans, kāi tenēi enīmlai tenēisan swentikans be swentinlai šins mēnsans be gēitin, kāi tenēi mazīlai sen teīsin upperautun. Deiwāi pastānja iztarītan tēt kāigi ānkstais bēi gērdautan, eraīns pastānja zmōnintan pa tenesse debbiskan. Stadden tenēi wedda wazukkan en jaūjan, erlāngja be wisāi ēit zūrgi tennan. Wārskaits dabber rēizan wartīna si, preiwakīntei wissan dēiwan kāigi [bēi ebpeisātan] ānkstais be perrēisa tīman be bilāi: “Sta ast nūse pirzdaunīkan swenta, teisīnga pagirris paminīsnā, kāi peršlūzilai etwērpsenjan ezze nūse dēiwan nērtjai”, — be erbasda wazukkan. Krāujai ni dāst di tektwei na zemmen, adder weddaissan spīgsta di sen tennan. Panzdau sklaitīna di mēnsan be dēt di en kattilan; wīrai ensīnda zūrgi pannu, be gennas perpēda gāidjas miltan, segēi iz tennan traskeīljans be etdāst tennans wīramans. Šai mitāi neizkeptan gēitin eraīns kitsmu pra degāntin pannu, ikkai ni jāutja, kāi sūit kēptan. Panzdau delijja di mēnsan. Kaddan tenā aubīrgta, staddan gerrja di be pūja iz ragans wissan naktin. Pirzdau āustran izēit wisāi emprīki kāiman, pēda sēn sin kaūlans be trussans — wissan, ka palikka. Tenēi sendēt wissan en jāukun deīktan, izmigga sen zemmin be ebsergēi, kāi stwi ne preiēilai ni pekku, ni sunnjai. Panzdau aujāt di en buttans be padāst si deiwammans. Dīnkaui di swāise zignātan (Segnoten), kawīds pastānja bilītan per Wārskaitan (Wourschkaiten), spārts zmnonināntei be teisināntei.

Zemmis dēiws Paskaits (Puschkaytus)

Buttan stesse dēiwan en zemmei pa saiwāgarjan. Šin garrjan tenēi laikka per zmōnewingjan be swentan. Pa tennan perpēda di gēitin, pīwan be kittan īdjan be madli di tennan erswāikstintun swāise Markapāljans (Markopolan) be autengīntun swāise bārzdukans (Parstucken) (līkutai zmānes) en tenēisan jaūjan, kāi tenēi perpēdlai stwen gēitin be kāi labbai erlaikālai stan, ka jāu perpēstan.

Naktin tenēi statīna en jaūjai stallan, dēt pīwan be gēitin, keptan be pāritan [īdjan], sūrjan sen anktan, perwākaui tennans en wāisjans be auwerrja jaūjan. Kaddan ankstāinai aupalla di īstan īdjan, staddan spārts tuldijja di si be stan īdjan, kawīds ukatūlan īsts, ekūmps upperaui di, ukatūlan dēt di nō stallan be druwēi, kāi sen dēiwan pagalban tenēisan arjas wīrst tūlninusjas si.

Bardāits (Bardoayts), jūrinikan dēiws

Stas dēiwas pastānja zmōnintan pra stans, kwāi plūja en marrjai anga jūrju. Tenēi druwēi, kāi debīks ēngels stalāi en jūrju. En kawīdan pāusan tāns ast pawartinānts, stwen tāns, dumīntei, ebwartīna laīwans, kawīdai tenesse nērtis paggan skēnda. Be arwjai prūsai, be sūdawai, be stāi, kas sen tennans ēit zukkautwei, — wisāi bilāi tennan per dēiwan Bardāitan (Bardoayts), madli si be upperaui tenesmu.

Tēt tenēi werda zukkan be dēt tennan en jaūjan na skistan kurkan anga salman, īda be pūja iz kārtikans anga iz līkutans gilljans tassins. Stwi stalāi tenēisan zignāts (Segnote), anga wārskaits (Woutschkaite), be waitjāi ezze wētran, be bilāi kwei tenēi turri zukkautwei be en kawīdan dēinan. Sirzdau tennans ast tūlan pikullas reddan.

Ezze tenēisan dājans prei perlūban be wesselin

Adder ik ainunts kwaitēi gaūtun tāwas duktin, staddan šis ni etdāst tennan gratis. Tāns turri tenesmu dātun 10 markans anga pa swāise lāiman. Ik tāns ni dāst penningans, staddan dāst tenesmu kurwan anga gēitin. Tāws ni wīrst etdāwuns swāise malnīkan swettimans grātis. Šāi turri taukintun kāuptun mārtjai mantelan sen krakstan. Kaddan martī jāu ast taukintan, tenā senwakēi swāise ginnins, gennans be mērgans, kāi tenēi ēmperi sen tennan raudālai. Martī pagaūnja nikānkintei si raudātwei. Panzdau tenā bilāi: “Wōi, wōi, kas wīrst ebstēguns māise tāwikas be mutrīkas laztikan? Wōi māise tēmparai kattika, sunniks, gertika, zansika, skēurika, swēikika, kas wīrst papekāwuns tennans?”

Staddan wisāi en buttu paraudāi, staddan tenā imma swāise ginnins be wedda sēn sin prēi pannu. Stwi tenā iztarra: “Ohow mey myle swente panike!” — sta zentli zūrgiskai: wōi, māise mīla swenta pannike, kas wīrst etpēduns tebbei sāusans malkans, kas wīrst sargāwuns ten? Be ezze spartasmu gulsenjan tenā ebmīnza, adder kaddan ginnjai stan endirēi, ebzūrgina tennan be bilāi: “Wōi, māise ginnike, ni graudēis tēt spārts, dirēis, kāi [gallus] dumslē ni drezlai si, kāi ni wīrst wīrtusi swāise wīru niprawerīngi”.

Kaddan mārtjai prawerru jātwei iz buttan, kaddan brūtgams tengīna abazzan, be kaddan perjāja prei kāimas arāikan, staddan aīns wīrs, preibēguns pas abazzan, en aīnassei rānkan turīntei lāpin, en kitsei — pīwas kragan, bajjina be erswāikstina. Kaddan tāns trīs rēizai zūrgi abazzan enbēga, be iztarra: “Kāigi tū en swāise mīlas tāwikas buttu sargāi pannikan, tēt be tālis sargāis, tēr tennan [— pannikan] jāu wīrst būwus gīmtan”, be preilajja mārtjai.

Weziks pastānja bilītan per kellawezjan (Kellewese) tenesse billai. Kaddan abazzus perjāt prei wartellins, tāns dīwai izsāka ezze zirgu, be šāisentei en māldas buttu kalsīwingiskai krīkstja: «Kellewese periot, Kellewese periot» — kellawezis perjāja. Staddan kellawezis be wisāi kitāi bēga iz abazzan en buttan. Pagār wartellin stalāi klūmpis sen bālzinjan nō kawīdan ast kekkuls. Ik kellawezis wīrst sīduns ni pīrmas nō tennan, tāns pastānja dēlbtan, skēiptan be tāns pastānja talkātun pra kittans wertellins. Adder ik kellawezis pīrmas wīrst gābuns klūmpjan, staddan tāns wīrst tūriwuns kekkulan, be tenesmu nika wīrst segīwusis di. Pazndau tenēi ebtīnka mārtjan, kellawezis etskīt, adder martī sīnda na klūmpjan. Tenēi ebkaīlina tennan. Kaddan tenēi izpūwa, staddan wedda tennan zūrgi pelannan, kellawezis pēda klūmpjan, tenā etkūmps pastānja sadīntan be tenesses naggis pastānja mūtan. Wāisjai, maldūnjas laztā, pekku, buttan be buttiskai traūkai pastānja pīgtan sen stan wundan. Staddan mārtjas akkis pastānja perristan, be wārsai pastānja āngtan sen meddu, be tenā pastānja westan prei eraīnan warrtellin, kawīdai ast en buttu. Prei eraīnan wertellin bilāi stas, kas wedda mārtjan: “Trenke, trenke” — brukkais, brukkais, — be tenā brukka sen naggin en wartellin. Pas tennans ēit zmōi sen zakkan, en kawīdsmu ast sklaitawīdai semeneīnai: gāidis, ruggis, māizis, wizē linnas semeneīnai. Tāns supja na mārtjan prei eraīnan wartellin be bilāi: “Nūse deiwāi wīrst dāwusis tebbei wissan sūit, ik tū wīrst palikkusi sen nūse drūwjan, nūse tēwan drūwjan”. Staddan tenesse akkis pastānja wērptan, wisāi sīnda prei stallan be pūja, dāncaui ergi wēlan bētan. Kaddan maldūnjams kismus jāu migītwei, staddan dāncauintei preiēit ainā iz tenesses ginni be pjaūnja tenessei skebbeljans, adder zūrgiskas gennas māukja wainikan sen preišutan gaīlan pastan, kawīda bilāi si per abglābtin (Abglobte), — tennan martī wīrst pādawusi, ikāi wīrst gēidusi na sūnun. Gennas bilāi: “Mergīka, kawīdan tū wīrst pādawusi, ast iz twāise mēnsan; kaddan tū wīrst gimmusi wāikljan, staddan twāise mērgas dēinas wīrst wangīnusjas”. Pazndau tenā pastānja westan prei laztan, staddan ebpjaūnja be perpēda di maldūnjamans maldan gertjan, keptan wazukkan anga kurwas pāutans. Per pūjan nimazīngi pjaūtun nikawīdans kastratans zwērins, kāi tenēi {maldūnjas} īdlai “wāisiniskan īdjan” be paliklai wāisiniskan.

Ezze aulaūwusins

Ik kas enwārgsta, staddan sadīna delli pīwas kannawins pa lāiman kāimai anga swāise ginnimans, kāi tenēi paraudālai tennan, kaddan tāns wīrst aulaūwuns. Nāws pastānja pamūtan en tappjai pīrtin anga staldu, tāns pastānja pamūtan skīstai be ebwīlktan en gaīlans rūkans, sadīntan na klūmpjan en sirzdu. Pazndau pīwas kannawis pussis pastānja izlaīstan, izlaītan en ainuntkawīdan rīkan, imma di kārtikan. Eraīns pūja per aulaūwusin be bilāi: «Kaīls nūse ginni» [«Kayls naussen gingethe»] — as pūja pēr ten, māise ginni, kasse paggan tū aulaūwa? Mīlan gennan anga ni turēi? Anga niturēi swāise pekku? Anga ni turēi swāise klentin? — wissan bilāntei sen rīmans. En panzdaumanin rīndan, kaddan pūja di, kwaitēi di labban naktin be madli tennan, kāi tāns en stesmu swētan ebkaīlinlai tenēisan wāraisjajans, brātins, ginnins, kāi sen tennans labbai sendīnglai, panzdau ebwēlka di tennan en rūkans, preikabīna prei grawwan pēiljan, adder zūrgi winzun ebgrenzza di ilgan pastan, enpēda penningans per īdjan.

Tālis, ik genā aulaūwusi, tennan ebgrenzza di sen āuwilkans, kāi tenā mazīlai bastītun ka nika, ik tenessei wīrst prawerīwus bastītun. Staddan erlāngina nāwan en abazzan, ginnis pagār līsta jāntei na zirgans sen erlāngintins sablins, kīrta winnan sen tennans be sen kalsīwingiskan tārin krīkstja: «Begeyte, Begeyte, Pecolle» — bēgaiti, bēgaiti, jūs pikullai. Gennas pagār līsta aulaūwusjan ērgi kāimas arāikan, kwei enkāpts sūls, be nō tennan ast šilings. Wisāi na zirgans jāt prei sūlan, subs pīrmas imma šilingan. Kāigi tēr tāns waidinna šilingan, tenēi etkūmps bēga prei nāwan sen erlāngintins sablins, lagzdins; eraīns, turīnts ainuntkawīdan ēnrankjan, suppina sen tennan en winnu be krīkstja kāigi ānkstais. Stāi, kas turri zirgans be abazzans, wezza aulaūwusjan en kapan. Kaddan tenēi etwartīna si en buttan, ik aulaūwusi genā, stadda imma wikkjan, linnan be grikkin, be stan, ka tenēi tenessei kwaitēi, deggina, dīgi segēi be pa wīras galan. Ikāi tenēi ni pastāi krikstētan, tenēi degginusis be nāwans, kāigi palīgu en nūse kīsman aupalla di tenēisan kapans na kapurnans en lāidju, kawīds tenēi bilāi per kapurnan (Capernen). Pelanni be kaūlai, lazīntai en pādans, be stas, ka endīja di aulaūwusimans, pastānja serrīptan.

Ezze mettasdeinans

Mettasdeinans, ik tēr gimtāi turri spārtins, tenēi swentinna etwirai, neswarewīngi, kasse mettasdeina sta ast. Ik gimtāi ni turri lāiman, staddan senrīnka si trīs, ketturjai anga pēnkerjai rēizai. Eraīns perwākaui swāise ginnins en kīrkin, kāi paminīntun swāise wāraisjajans, en kīrkis padwarrju bilāi ezze aulaūwusins; panzdāu ēit en brewīngjan piweīnan. Wīrai sīnda sklāitiskai, gennas dīgi, tennas perpēda liškin sen keptan be aubīrgtan zukkan. Dwāi gennas ebšlūzi prei stallan. Niaīnunts ni turri bilītun ezze īdjan. Abbas gennas padāst īdjan, be niaīnunts ni turri izwīlktun pēiljan. Īdis sklaitīntan tēt, kāi ni prawerru turītun pēiljan. Staddan tenēi īst, be eraīns stan, ka bēi palīkitan aulaūwusismu, mitāi pa stallan be lajja pīwas kārtikan. Kaddan pujā wanginna si be stalāini auīmta, staddan wisāi dīnkaui stan, kas swentinnuns dātan, be pagaūnja pūtun kaīls pas kaīls aīns per āntran [kayls posslayls eins peranters] be gremja swāise grīmans, ikāi tenēi mazzi stalītwei sen naggins. Sta genā, kawīda pūja per wīras kailūstiskan, izpūwusi etskīt, padāst kārtin wīru, dāst tenesmu rānkan be buccaui tennan en wārsans. Stan subban segēi wīrs per gennan.

Ik ainuntsmu ka nika rāngusis di

staddan laukijja di waīdilan (waidler), sta ast genā, anga wīrs. Stan segēi be miksjai, be prūsai. Waīdils (waidler), anga burrewis pastānja bilītan dabber per zignātan (Segnoten) be tenēi pastānja spārts zmōnintan, kāi tāns iz swāise kārban nikasmu nika ni endēlai, ka mazīlai škūdintun pekku anga kailūstisku. Stāi zignatāi (Segnoten) jāuku ast klūmbjai, gurīnan, spāngan be subbai sebbei nimazzi nikāigi pagalbtwei. Kaddan tenēi pastānja prasītan kasse paggan tenēi ni pagalba sebbei, etrāsenis ast stawīds: tenēisan dēiws tēt kwaitēi. Tēt stas zignāts (Segnot) preiwakēi dangus dēiwan Ukapirman (Ockopirmum) be zemmis dēiwan Paskaitan (Puschkaitus) be madli tennans, kāi šis wags ni mazīlai perēitwei pra arāikan. Panzdau tāns imma dwāi rīkikans, be stas, kas pastāi ebrāngtan, endēt dwāi penningans: aīns — waggi, kits — sebbei. Wāidils glaubāi skrīzjan ✝ sen krīdin en minsāwei. En kawīdei pussin waggis pennings ast, stwen tāns aubēguns, — sta mazzi būtwei pussideināi, wakarāi, zeimāi anga deināi. Staddan tāns bilāi: stwi prawerru laukītun tennan. Ebrāngts turri perpēstun pīwan, kawīdan tāns [=waīdils] zignāi. Tāns imma klūmpjan, sīnda; minsāwin anga kārtikan erpilninna pastippan sen pīwan be statīna na zemmin, dirēi en dāngun, erlāngja rānkans be iztarra: “Ō, warewīngi dēiwe dangus be lauksnan, sen swāise spārtan be rikaūsnan laipīnais wāikans, kāi twāise zmōnis ni būlai etīmtan, kāi šis wags ni mazīlai aupaltun pakkajan be etdwessenjan, ik ter mazzais staddan, kaddan tāns preiēilai be perpēdlai ka tāns rānguns”. Stwi tāns stan wissan nagīrbaui. Tāns erlāngja kārtin be nadirēi kīrsa pīwan. Ik pīws turri spāinan — madla bēi kirdītan. Ik nikawīdan zentlan ni ast, staddan tāns izpūja din be etkūmps erpilninna; be segēi kāigi ānkstais, madlintei kittan dēiwan — pazemmis rīkis dēiwan. Wissan stan tāns āntrina ērgi stan kēsman, ikāi pikulliskai dēiwai ni wīrst dāwusis zentlan — na pīwan tīnka spāina. Tāns wanginna sen swentas Īzus emnin be iztarra: en Tāwas ✝ be Sūnus ✝ be Swentas naseīljas emnin. (Dirēis, wargaisegīnts, kāigi tū dēiwas sūnun perwartīnuns en Pikullas wāikan).
Miksjai bilāi stans māitarans per prawīdjans, tēt spāngs spāngan wedda. Ik wags preiēit anga buwāi di, kāi tāns pastānja gabtan, sta zentli, kāi drūwis bēi spārtan be warewīngi, — kāigi zmōi druwēi, tēt sen tennan be izgūbi.
Dīgi tenēi ebzignāi spāngans, klentins, zmānins ezze wisawīdiskamans enwārgsenjans be etrīnka tenēimans dēiwan, kāigi ānkstais bēi papeisātan.
Dīgi, ik tenēi bujja stan, stas kawīds madli ebzignāsnan, šis [=zignāts], enwaitjāntei prei dēiwan, ni bilāi tenesse [= dēiwas] emnin, adder tēr bilāi tennan en pamīrisnamans, bilāntei: “Dirēis, anga sta ni ast Rikijjas grazwāi wirdāi, adder mes turrimai pastātwei ebkektan be ebsmeītan, be stesse paggan mes wīrst pastāwusis trintan, deggintan, sadīntan en kalūzan. Ik tū auminijja anga kwaitēi ettikrōmintun si, anga wārgai kāi as wīrst pagalbuns sen dēiwas wīrdan? Zmānimans buwāi walnan be Dēiwu as zmānis, kaddan wagges pastāi sūnditan”. Sen stawīdans wīrdans tenēi patikīnusis tūlan zmānins pra nidruwīngjans. Stesse paggan sargāsei mans Dēiwas sūns ezze stesmu, beggi walns enēitwei en Dēiwas rīkin sen aīnan rānkan be sēntjai spāngs nikāi sen abbans en prabūtiskan nīksnan.