Dwāi laūmas spaktaūwa be pawērpi swāise plaugzdas rūkans. Pergūbi aīns zmōi be rānguns aīnas Laūmas rūkans. Aīnan naktin stāi mergā pergūbi prei din. Stas wīrs migīwuns be aupalluns stawīdan grazzjan mērgan prēi sin be prasīwuns – kwēi tenā teinū pragūbi en buttan be tenā pawaidīnusi, kāi pralīzusi pra prāljan. Zmōi immuns be auwīruns stan prāljan sen karīgis lagzdan. Laūma delli dēinans bēi stwen ni mazīwusi izēitwei be ēnwangan pastāi per tenesse gennan. Tenā delli mettans buwīnusi sen stan zmānin be jāu turēi sūnun. Aīnan rēizan zmōi aujāwuns. Tenesse māti gērdau laūmai, kāi tenā astits spārts grazzu, adder laūma etrāi: matrīka, ik tū widālai men en māise rūkamans, kawīda as bēi grazzu. Wīras māti perpēda tenessei stans rūkans, laūma ebwīlkusi be bilāi māterei: „Kīrdi tū, kāi en Ringai kalsāi kalsīlai?“. Teinū, bilāi, ik twāise sūns kwāi men widātun etkūpms, jaīsei tāns en stiklāinan gārban pēr men. Gērdau be auskrāidusi. Wīrs pergūbi en buttan adder genā nikwēigi ni ast. Tēt tāns gūbi laukītun stan stiklāinan gārban. Gūbi be ebtinka debīkan wīran. Tāns stesmu debīkasmu wīran bilāi, kāi laukijjats stiklāinan gārban. Stas wīrs bēi subs kuks. Tāns pamēri be gērdau: „jaīs prēi māise brātin“. Stas bēi debīkaisin. Stas wedduns wīran prēi stiklāinan gārban, adder tāns ni turēi klaūtalans, kāi etwerīlai din. Stesse paggan tāns wartīnuns si etwārtai be stwi ebtīnka bittin. Bitti gērdau tenesmu, kāi waīdats kwēi ast klaūtalai. Tēt tenēi pergūbi prēi aīnan ragganan be zmōi palikkuns šlūzitwei prēi din. Stāi raggana gērdau, tāns turrits trins dēinans pūstun trins klentins, adder sta bēi tenesses duktes. Tenā gērdau, ik tāns wīrst segīwuns stan, tāns wīrst gaūwuns klaūtalans, adder ikkai ni, wīrst turīwuns galwan senkīrstan. En pirman dēinan wissan tāns segēi labbai, adder bētai kaddan prawerēi buttan gūntun klentins – iznikka klentis. Tennas bēi enlīzusjas en guddin, adder bittis izgunnusjas dins. En āntran dēinan stan subban – pastippan dēinan klentis ast šāi, adder bētai – etkūmps iznikka. Teinū tennas bēi enlīzusjas en zigzdan, adder zangēi izgūnusis dins. En tīrtan dēinan tāns etkūmps pūsi adder bētai klentis etkūmps bēi iznikkusjas be enlīzusjas en wundan. Stan rēizan rākai izgūnusis be tāns etkūmps gūnuns klentins buttan. Stāi raggana turēi pippelkan, be stāi turēi pāutan. En stesmu pāutan bēi klaūtalai. Be stāi pippelka mettusi stan pāutan en wundan. Teinū stas zmōi jāu ni mazēi gaūtun din. Staddan rākai tenesmu perpēda stan pāutan. Tēt tāns teinū turīntei klaūtalans gūbi prēi stiklāinan gārban. Adder stāi laūma gērdau, kāi ni mazzits jāu sēn din ēmperi ēitwei, beggi per grazzu tenā ast be tēt tāns etwārtai wartīnuns buttan.

Labārtai, Mēmelis skrits. XIX mettasimtas wangā.