Muzīki Archives - Prūsas Tāutas Prēigara

Ērberts Brusts be Rāmawa

Glabbis — Fri, 17 Apr 2020 01:41:38 +0000

Ērberts Brusts

 “Taweīnas dūms ast lāukiskaisis nikāi swetti pannu”
 (nōpeisan na Rāmawas Buttan)

1900 m. sakkjas 17 d gimma Ērberts Brusts (miksiskai – Herbert Brust) en Kunnegsgarbu, prūsisks kompōnists. Tenesse buttan stalāi en Pirzdasmu Rasgārdu prei Kunnegsgarbas pillis twānkstan, en deīktu kwei panzdau pastāi zēists Mēstas Zāls.

Deīktan kwei gimma Ē. Brusts en Pirzdasmu Rasgārdu, 1885 m. auīmsenis

Adder en 1901 m. Ē. Brustas wāraisjai praskīja en Knīpawas sallas Magistran gatwin, en buttan prei subban Prēigaras appin.

Knīpaws. Prajāsenis ezze Prēigaras appei en Magistran gatwin.

Knīpaws. Magistran gatwi, 46

En 1924 m. Ērberts Brusts wedduns gennan Edītan be tenēi praskīja en Nawakursjans, prēi Baltijas jūrjan be pabilīwusis swāise buttan per “Rāmawan” anga “Rāmawas Buttan”. Kīrsa “Rāmawas Buttas” enēisenjan bēi nōpeisan: “Taweīnas dūms ast lāukiskaisis nikāi swetti pannu”.

Interessanti, kāi šis izbilīsenis pastāi papeisāts 21 mettans ānkstais nikāi nūss Taweīns, Prūsa, wīrtusi en Dūmans anga bēi gūbusi en dūmans en 1945 m.

Kittapausiskai šis izbilīsenis waidinna Rāmawas prātin: en 20 mettasimtu Rāmawa, kāigi prūsiskas tāutas astis, ast tēr dūms, pelanni, zarrjas. Pannu ni ast, adder wis dabber ast dūms. Be šis prūsisks dūms, Rāmawas dums ast spārts warewīngis, swents.

Nawakursjai turēi swāise legēdiskan atmosfēran īr in 20 mettasimtas pagaūsenju. En mēstas centru ērgi 1905 m. stalīwusi warā krausī, kawīda faktiskai bēi swenta, seitā sem mīlan, wesselins be seīmjas deiwūtiskan.

Warā krausī en Nawakursjamans

Tēt dīgi ni tēt tāli ezze mēstas centru bēi labbai waīsts Burtastabs, kawīds dīgi ast sēits sen mīlas burtans.

Burtastabs prei Nawakursjans, zūrgi 1920-1930 m.

Malnīkai prei Burtastaban.

Mazzi būtwei, šī atmosfēra endēlina Ē. Brustan pabilītun swāise buttan per “Rāmawan”. Tēt dīgi bēi bilitā tenesse perlazīntwi – Rāmawa, miksiskai Romowe Verlag.

Rāmawas perlazīntwis logōtips

Ē. Brusts bēi teikāwuns 96 teikālins. Tāns tērpawuns Priccas Kudnikas, Āgnesis Mīgelis be kittan wērsans.

Tāns pastāi zināts pra swāise Prūsas grēman:

 Timran meddjan tāuta,
 Eīskun azzaran -
 Kīrsa plattun laūkan
 Swāiksti pāitaran.
  
 Kīrsa pelkins, teīnan
 Āustra jāu etskīt - 
 Tēt pagaūnja dēinan
 Skīstan swāikstan, tēt.
  
 Treppa spārtai būrai,
 Pas plūgan dei ēit
 Be en dāngu dūrai
 Pippelka jāu skrēit.
  
 Jūris tenna grēmuns
 Iz deiwūtiskan,
 Braīdis enklausīwuns
 Ēn Prābutiskan.

Prūsas grēma pra Kaūnas kōran

Ērbertas Brustas “Prūsas grēma” dajatā pra tenesse sūnun Muninan Brustan en 1993 m.

Ērbertas Brustas “Stebbulan prei jūrjan” dajātan pra tenesse sūnun Muninan Brustan en 1993 m.

Bilāimai prūsiskai per Gīmtas Billas dēinan

suplits — Sun, 21 Feb 2016 21:50:33 +0000

Stan rēizan per Gīmtas Billas dēinan mazīngi kirdītun arwiskai labbans prūsiskans pawīstins.

Kaddan gi ni tēr deznimai mazīngi kirdītun prūsiskan bē ni tēt deznimai mazīngi aupaltun ainuntkawīdans nawwans prōjektans prūsiskai (sklaitewīngi, kaddan mes bilāimai ezze kwalitatīwans pawīstins, kwēi prūsiskan kalsāi grazzu be tikrōmiskai), prawerru butewīngi ebzentlitun stans nawwans muzīkis prōjektans:

Dabber aīns prōjekts iz Kunnegsgarban Kellan sen dēinan Prūsa gimtā

Be dīgi āumeningi per Gīmtas Billas dēinan bēi enpeisātan H.G. Pōdēljas wērsan Labban dēinan. Wērsan skaitāi Astars Stakamesseris.

Enimmumni kirdītun, kāigi prūsiskan kalsāi tūls be tūls.

Tērpauti PRŪSISKAN madli – bilāiti be gremjaiti!

Prutena en Wilnei

suplits — Mon, 30 Nov 2015 10:30:26 +0000

Kalēndiskan swāisktan wīrst pagaūwus si en Swentaraggju — 2015.12.12
Iz wundas plūjan, pra magiskans supnans be niwaīstans pintins. Pas nawwan dāngus pagaūsenjan be nawwan saūlin.

Gēidjamai nō wans en Wilnei, LLKC – kwēi prūsiskas grēmas be gērdai wīrst kalsāwusis etkūmps.
Sen albuman preistatīnsnan Romowe Rikoito (prūsiskai) be Esatis (leītawiskai) wīrst birbinnusis.

Nawwa plattiki stesses Romowe Rikoito jāu perlazīnta

suplits — Fri, 28 Mar 2014 14:24:42 +0000

Šandēinan leītawiska perlazīntwi Dangus pawakēi, kāi naws albums stesse prūsiskas gruppis Romowe Rikoito jāu ast gattawan be perlazīntan.

Naws albums turri pabilīnsnan Undēina: Lanktā lānkina lunki līnku Aīstas Austjas. Subs albums anzrai sejja sen baltiskan be prūsiskan mitolōgijan: Undēina ast pints: māgisks, swēnts, krēiws. Na subban enrissenjan stesses plattikis ast dēiws Kaūks. Dīgi na plattikin mazīngi aupaltun pawīstins iz baltiskan be prūsiskan mitolōgijan, ppw. prūsiskai deiwāi, zentlāi, simbōljai, kliptinai nōpeisai sen prūsiskans litterans be tūlan kitawīdai. Klausīntjai “Undēinan” mes izpilninimai māgiskan pintegan pa tēntiskan wakkarai-baltiskan swētan. Pra stan pintegan pastānja enlaukītan kawīdai iz baltiskans mitolōgiskans aspektans ast dabber giwāi teinū en nūsmu tēntiskasmu swētu be kāigi tenēi dēlai en reālai gīwatai. Stēisan tekstan grunts ast simbōliska meddjaga iz reālans pintegans en swentans deīktans (2001-2011 m.), dīgi enpeisāsenjai stēisan supnan be fiksisnā stēisan gaūtan zentlan en stan kērdasetrapan. Albumas prāts ast mitolōgiskan Tēntiskan: tēntiska plattibi sirzdau reālans swentans deīktans be supnans, sen tenesses kliptans, mīntins, arāikans be wārtans. Be stāi māgiska pintega ast dēiwas Kaūkas be dēiwis Kurkas perōniska teikasnā – wīzija pertengintā pintegaūniku; rindā stēisan mīntin, pra kawīdans pintegaūniks turri praēitwei na pintin prei ukawāraisjans baltiskans kliptans be gaūtun klaūtalan.

En albumu ast prūsiskas, ēngliskas be leītawiskas grēmas, tenēisan tekstai ast en bukletu, stwen gi ast tenēisan talkausnā en ēngliskan.

Grēman listi:

01. Bewangiskas pintegas pagaūsenis
02. Rantawa
03. Swentagrēiwa
04. Kunnegsgarbs
05. Twānksta town
06. Āustrawīdja
07. Merūnas dwars
08. Merūnas meddjan
09. Skaītan
10. Dēinawas deināina
11. Undēinas dajā
12. Bewangiskas pintegas wangā

Plattikin mazīngi aupaltun be kāuptun en Dangus.net.

Dīgi Romowe Rikoito turri swāise pāusan, palikītan stesmu albumu: http://romowe.twanksta.org