1917 m. sakkjas 9 d. gimma Jōaness Bobrōwskis en Tilzei (Skallawa), prūsisks peisātajs be pōets. Tenesse tētjai perjāja en Skallawan iz Bartan, iz Rāistanpilin. Be en 1925 – 1928 m. tāns buwinna en Rāistanpilei, en 1928 – 1938 m. en Kunnegsgarbu.

Bobrōwskjas galwas prāts ast Sarmātija – perōniska dēiniska Eurōpa, aīniska kultūris plattibi . Prūsiska tautāspawida per Bobrōwskjan ast klaūtals, pra kawīdan tāns pagaūnja mēritwei ezze prūsiskan amzjan, tāutan be billan.    Bobrōwskis bēi peisāwuns dwāi rōmanans „Lēwinas malūns“ be „Leītawiskai klawīrai“, 36 gērbsenjans be tūlan wērsans.

 Bilā
  

 Garrjan
 debbaisi nikāi nakts
 dwesjānti sen azzaras līndan
 rusēi ezze tusnan
  
 Stabāi
 pa nagīmans
 zarāntjas gīslas
 wārai en puslīmans
 emprābutiskan
  
 Bilā
 izguntā
 tenesses gurrusi austā
 en bewangibis pinti
 prei kaimīnas buttan 

***

 Arellis
  

 Auwērpintjai skreīljans
 kīrsa appin,
 kīrsa rāistan 
 arellis kabba en dāngus kuppulai
 sta ast zentlan, kawīdse krakstāi tilli,
 endēlbtan en māise wārtas garāinan,
 nagāi - as wīrst etbudduns stwi, swaigīnts,
 na meddjas gārban
 as wīrst etbudduns sen begāntjans akkins
 iz tankiskan.
  
 Auwērpintjai skreīljans
 arelljan as endēlbuns
 prei swāise buttas pellekan -
 as wīrst migīwuns, be en māigai
 wīrst etskīwuns kāigi zentlan iz pelannin
 aūktai kīrsa meddjans. 

***

 Aīnat madli emnins:
 garrjan, skraidānts pippelis,
 wārmjawingi wāla,
 kwei appi strāuja, zalli,
 be zuks en gailasmu kupsīnu,
 kaddan miglā krūja en meddjans.
  
 Zentlāi, bārwis, sta ast stawīda spīli
 As dwigubāi anga sta wangīnlai si tikromiskai.
  
 Be kas izmakīnlai men,
 ka as izmīrsuns: stabbas māigan,
 skraidāntis pippeljas māigan,
 garrjas māigan, 
 anga waitjāi tenēi en timru -?
  
 Būlai stwi Dēiws
 be turīlai tāns kērmenin,
 be mazīlai wakītun men,
 as ēilai ebzūrgiskai,
 as biskin gēidlai. 

***